Ehr liewe Leit,

seit März 2013 gebts hier e bissel was uff Pälzisch.

Die Lombreschter Gäßbock Pfingschtfeschtschpiele
(Pentecost Feschtschpiele in Lambrecht/Palatinate)

Isch hab den Videoclip iwwer die Schpiel extra noch mol uff pälzisch gemacht, fer die Pennsilfaanisch Deitsche. Die hänn ä ähnlischi Schprooch wie pälzisch. Fer aisch Pälzer is ä Iwwersetzung jo net netisch, weil er all Hochdeitsch verschtehn. Awwer isch glaab, die Pennsilfaanische kännen besser Pälzisch unn krieschen uff Pälzisch ä bissel was vumm Alde Lond mit, aus dem se jo ins Neie Lond ausgewonnert sinn, iwwer Brauchtum, Kulduur unn so was. Wenn isch änni vunn denne wär, tät misch des schunn interessiere.

Im Clip geht's um die Hinnergrind vunn unsere Gäßbock Schpiele, wo die Lombreschter als Tribut änn Gäßbock noch Deism (Deidesheim/Palatinate) liefere misse. Die Feschtschpiele sinn iwwrischens bloß alle finf Johr. Unn des Johr, 2013, iss es widder so weit.

Gäßbock aus em Faßdeckel geschnitzt
Link zum Videoclip

In Wirschlischkeit misse mer Lombreschter jedes Johr änn Gäßbock noch Deism liefere, wesche Weiderechte im Deisemer Hinnerwald. Des geht schunn seit iwwer 600 Johr so. Streit hots ach zwischedrin gewwe unn Verhonnlunge deswesche. Awwer die Hitzkepp hänn sisch in de letzschte paar hunnert Johr oigekrischt unn mer feiern die Iwwergab vumm Bock hauptsäschlisch.

Die Uffnohme fer moin Videoclip haw isch 2008 mit änner billische Komera gemacht. Deswesche hab isch monschmol was in schwatz-weiß drin, weil's donn halt ald aussieht unn alde Uffnohme hänn jo meischtens net so gudi Qualität.

Gäßbock Versteischerung

Omm Pfingschtdienschtach is unser Lombreschter Gäßbock morschens vor Sunneuffgong vum zuletscht getraute Lombreschter Ehepaar iwwer de Bersch noch Daism gebrocht worre. Inzwische derf de Gäßbock nimmi noch Deism laafe wesche dierschutzreschtlische Grind. Deswesche laaft der bloß noch die letschte paar hunnert Meter in Deism. Dort werd er feschtlisch in Empfong genumme.

Empfong vum Gäßbock

Donn werd gegesse unn getrunke.
Gonz wischtisch is, dass unnersucht werd, ob de Bock änn escht gude Zuchtbock is. Sunscht werd de Gäßbock garnet erscht vunn Daism ohgenumme.

Rathaus in Daism

Wenn de Bock änn gude Oidruck macht, is donn owends die Gäßbock Versteischerung vorm historische Rathaus dort.

Versteischerung in Daism
Die drei Fodos sinn vunn Wikipedia

Iwwerhaupt hab isch die gonz pälzisch Rubrik bloß wesche aisch Pennsilfaanisch Deitsche ohgefonge. Des is mol ä gonz onnri Art vunn Multikulti (intercultural exchange). Unn schreibt mer mol onn hch(at)adjowah.de odder onn moi Adress im Imbressum.

Liewe Grieß aus'm Alde Lond!

Uff pälzisch gebt's noch moi Gedischte Elwetritsche fonge unn ebbes iwwer ä Fraa.